Աղբիւր՝ www.yerkir.am
Հայաստանի սահմանապահ եւ սահմանամերձ գիւղերը ռազմավարական մեծ նշանակութիւն ունեն մեր երկրի համար, սակայն այսօր այդ գիւղերն ունեն բազմաթիւ խնդիրներ. ցայսօր էլ գնդակոծւում են Հայաստանի, մասնաւորապէս` Տաւուշի մարզի սահմանամերձ գիւղերը, շատ ցածր է ծնելիութիւնը, գիւղերը դատարկւում են երիտասարդներից, անմխիթար են կրթական, մշակութային օջախների վիճակը, գրեթէ իւրաքանչիւր ընտանիք գտնւում է սոցիալապէս ծանր վիճակում:
Ելնելով այս ամէնից` Հ.Օ.Մ.-ի Հայաստանի Շրջանային վարչութիւնը, լաւատեղեակ լինելով եւ յաւելեալ ուսումնասիրելով սահմանապահ եւ սահմանամերձ գիւղերի հիմնախնդիրները, նախաձեռնել է «Սահմանապահ եւ սահմանամերձ գիւղերի օժանդակութիւն» ծրագիրը, որի նպատակն է նպաստել գիւղերի շէնացմանը եւ սահմանների պաշտպանութեան ամրապնդմանը, հնարաւորինս աջակցել գիւղացու արժանապատիւ ու ապահով կեանքին, դառնալ նրա հոգսերի կիսողը:
Հ.Օ.Մ.-ի Հայաստանի Շրջանային վարչութիւնը հրատապ եւ առաջնահերթ համարելով ծրագիրը, որի իրականացման համար ձեւաւորուել է յանձնախումբ, ակնկալում եւ կարեւորում է Հայաստանի եւ աշխարհասփիւռ հայութեան մասնակցութիւնը ծրագիրն համատեղ ջանքերով իրագործելու համար:
Ծրագրի իրականացման նպատակով բացուել է յատուկ հաշուեհամարներ՝ սահմանամերձ եւ սահմանապահ գիւղերի օժանդակութեան նպատակով, որի միջոցով Դուք կարող էք կատարել Ձեր բարեսիրական եւ բարեգործական նուիրատուութիւնները:
Վստահ ենք, որ Ձեր նուիրաբերած իւրաքանչիւր լումայ կը ծառայի յանուն ամուր սահմանի, յանուն ուժեղ հայրենիքի: